اب تو اٹھ سکتا نہیں آنکھوں سے بار انتظار

اب تو اٹھ سکتا نہیں آنکھوں سے بار انتظار

کس طرح کاٹے کوئی لیل و نہار انتظار

ان کی الفت کا یقیں ہو ان کے آنے کی امید

ہوں یہ دونوں صورتیں تو ہے بہار انتظار

جان و دل کا حال کیا کہیے فراق یار میں

جان مجروح الم ہے ، دل فگار انتظار

میری آہیں نارسا ، میری دعائیں نا قبول

یا الہی کیا کروں میں شرمسار انتظار

آن کے خط کی آرزو ہے ، ان کا آمد کا خیال

کس قدر پھیلا ہوا ہے کاروبار انتظار

ہے دل مسرور حسرت اک طرب زار امید

پھونک ڈالے گر نہ اس گلشن کو نار انتظار