Khulus-o-uns-o-mohabbat ka tarjumaN sehra

Khulus-o-uns-o-mohabbat ka tarjumaN sehra 

Wafa ka dars sikhata hai be zubaN sehra 

Sukun-e-qalb ka markaz, khushi ka mahwar hai 

Dil-o-nigah ki asmat ka pasbaN sehra 

Wafa ke jazboN se, chahat bhare umangoN se 

Sajane aaya hai diwar-e-jism-o-jaN sehra 

MohabbatoN ke samundar maiN do diloN ke liye 

Bana hai kashti-e-ulfat ka badbaN sehra 

Hisar-e-kaif-o-musarrat main lene aaya hai 

JawaN diloN ke tahammul ka imtahaN sehra 

Zamana is ki haqiqat se khub wakqif hai 

Ke chhodr jayega yadoN ka ek jahaN sehra 

GuloN ki ladiyaN na samjho ise faqat RAGHIB 

Hai khahishoN ke sitaroN ka aasmaN sehra