”جلے تو ، جلاؤ گوری“

”جلے تو ، جلاؤ گوری“

جلے تو جلاؤ گوری ، پريت کا الاؤ گوری

ابھی نہ بُجھاؤ گوری ، ابھی سے بُجھاؤ نا

پريت ميں جوگ بھی ھے ، کامنا کا سوگ بھی ھے

پريت بُرا روگ بھی ھے ، لگے تو لگاؤ نا

گيسوؤں کا ناگنوں سے ، بيرنوں ابھاگنوں سے

جوگنوں بیراگنوں سے ، کھيلتی ھی جاؤ نا

عاشقوں کا حال پوچھو، کرو تو خيال پوچھو

ايک دو سوال پوچھو ، بات جو بڑھاؤ نا

رات کو اُداس ديکھيں ، چاند کو نِراش ديکھيں

تُمہيں جو نہ پاس ديکھيں ، آؤ پاس آؤ نا

روپ رنگ مان دے ديں ، جی کا مکان دے ديں

کہو تُمہيں جان دے ديں ، مانگ لو ، لجاؤ نا

اور بھی ھزار ھوں گے ، جو کہ دعويدار ھوں گے

آپ پہ نثار ھوں گے ، کبھی آزماؤ نا۔

”ابنِ انشاء“.